Hezkuntza dute defentsarik onena.

©JRS Líbano

Kolonbia

Kolonbian oraindik bizirik jarraitzen dute gatazkaren dinamikek, eta eragin larria dute kolektibo ahulenetan. Hori da Buenaventurako eta Valle del Caucako beste udalerri batzuetako komunitate etnikoen kasua, gatazkaren ondorioz nahitaez lekualdatu behar izan baitira.

Inguru horretan talde armatuak daude 2022an barne-gatazka armatua berpiztu zen ezkero, eta, landagune nahiz hiriguneetan lurralde handiagoa kontrolpean hartu ahala, lekualdatzeak, konfinamenduak eta mugikortasun-murrizketak eragiten ari dira, baita elikadura-segurtasun, osasun-laguntza eta babes beharrak ere.

©FE Y ALEGRÍA COLOMBIA

2024an, 317 gatazka armatu identifikatu ziren, 44.000 haur eta nerabe baino gehiagori zuzenean eragin zietenak.

Errefuxiatuentzako Zerbitzu Jesuitarekin (JRS) batera, hainbat ildo lantzen ditugu:

- Hezkuntza formala, eskoletan eta hezkuntza-ingurune ez-formaletan babesteko estrategia gisa, haurren segurtasuna eta babesa sustatuz nahitaezko errekrutamenduaren eta haiek legez kanpoko jardueretan erabiltzearen aurka.

- Banakoen eta familien kasuak kudeatuz babesteko estrategia, haien oinarrizko premiak asetzeko eta haien eskubideak bermatzeko, babes-ikuspegi batetik.

- Lege-orientazioa eta laguntza psikosoziala lekualdatutako edo konfinatutako komunitateentzat, babes-neurri nazional eta nazioartekoak, eskubide kolektiboak, komunitatearen jardunbideak eta kultura kontuan harturik.

Ukraina eta herrialde mugakideak

Ukrainan gerra hasi zenetik, 14 milioi pertsonak baino gehiagok utzi behar izan dituzte beren etxeak. Sei milioik baino gehiagok Europako beste herrialde batzuetan bilatu dute babesa.

©CONCORDIA MOLDOVA

©JRS RUMANIA

Krisi humanitario luze horretan, JRSrekin batera, zaurgarritasun-egoeran dauden lekualdatutako 120.000 pertsona baino gehiago lagundu ditugu. Gure erantzuna integrala izan da: 612.606 zerbitzu indibidual eman ditugu, larrialdiko laguntza humanitarioa, ostatua, laguntza psikosoziala, hezkuntza, eta gizarteratze eta laneratzea barne.

Sufrimenduak eta ziurgabetasunak gorabehera, elkartasunak itxaropen-iturri izaten jarraitzen du.

Milaka pertsonen laguntzari esker, gehien behar dutenen alboan egoteko lanean jarraitzen dugu, laguntza handiagoa eman ahal izateko.

Libano

Libanoko gatazka berriak 1.200.000 pertsona baino gehiago lekualdatu ditu, dela herrialde barruan, dela beste herrialde batzuetara, hala nola Siriara.

©CARMEN MORENO

©IVÁN BENÍTEZ

Libanoko JRSrekin batera, ekintza-ildo hauek lantzen gabiltza, kaltetuenei arreta emateko:

- Elikagaiak, higiene-kitak eta premia larriko gaiak banatzea.

- Barne-lekualdatuentzat aldi baterako ostatuak jartzea.

- Laguntza psikosoziala ematea kaltetuei, lehen laguntza psikologikoak barne, banakako zein taldeko saioetan.

- Arropa-kitak banatzea.

- Larrialdiko laguntza ekonomikoa banatzea.

Gainera, herrialdean duela hamar urte baino gehiagotik egiten ari garen lanarekin jarraitzen dugu, hezkuntza, arreta psikosoziala, ostatua eta bizibideak eskaintzean zentratuz, eta Libanoko eta beste nazionalitate batzuetako milaka pertsonari arreta emanez.

Siria

Libanoko gerran, lekualdatzera behartutako pertsonei laguntza emateko zentro bat ezarri genuen Homsen, JRS Siriarekin batera. Herrialdeko iparraldetik eta Libanotik datozen pertsona taldeak iritsi dira, eta, hortaz, handitu egin da etxebizitzaren gaineko presioa. Taldeen arteko tirabirak etengabe hazi dira, eta indarkeriaren gorakada kezkagarria da.

©JRS SIRIA

Egoera horren aurrean, gai hauetan lanean jarraitzen dugu:

- Lehen mailako arreta: neguko kitak, janari-saskiak eta familientzako laguntza eskainiz.

- Hezkuntza jasotzeko aukera:
  - - Sirian lekualdatuta, errefuxiatuta edo egoera zaurgarrian dauden haurren gaitasunetara egokitutako ikasketa-mailak eskainiz eta eskola-kitak banatuz.
  - - Alfabetizazio- eta aritmetika-eskolak irakatsiz, eskolan jarraitzeko eta ikasteko laguntza emanez, maisu-maistrak trebatuz, eta udako kanpalekuak eta jarduerak eskainiz.

- Gatazkak kudeatzeko eta bakea eraikitzeko gaikuntza: familiekin eta komunitatearekin lan eginez.

- Esku-hartze fokalizatua laguntza psikosozialean: gurasoentzako, familientzako eta haur eta nerabeentzako laguntza egituratuko talde eta saioen bidez.

- Osasun-arreta jasotzeko aukera: osasun-zerbitzuak emanez, arreta pediatrikoa eta ginekologikoa barne.

Kongoko Errepublika Demokratikoa

Joan den urtarriletik, Kongoko Errepublika Demokratikoan maila lazgarrietara iritsi da iraupen luzeko krisi humanitarioa. Borrokek bi milioi pertsona baino gehiago behartu dituzte beren etxea eta sustraiak uztera, eta milizien ekintzaren arriskupean jarri dituzte Goma inguruko milaka biztanle (Ipar Kivu probintzian). Biztanleek ez dituzte oinarrizko hornigaiak, hala nola ura, elikagaiak eta elektrizitatea.

Neska-emakumeak neurriz kanpo ari dira sufritzen gatazkaren indarkeria, talde-bortxaketak eta beste abusu eta indarkeria batzuk sufritzeko arriskuan baitaude.

Kontrolatzen ez badira, litekeena da Aintzira Handien eskualde osoan zehar hedatzea borrokak.

©BÁRBARA GIL

Kongoko Errepublika Demokratikoko JRS erakunde aliatuarekin batera, xede hauek lortzeko lanean ari gara:

- Elikagaiak eta bestelako hornigai batzuk ematea, batez ere, duela gutxi lekualdatutako pertsonei.

- Laguntza psikosoziala eskaintzea Goma eta Masisi hirietako azken borroketan zauritutako pertsonei.

- Sexu-indarkeriako kasuak artatzea.

- Kaltetutako eskolak birgaitzea eta hornitzea.

- Inoren kargura ez dauden eta bananduta dauden haurrak babestea.

- Lekualdatutako biztanleei bizibide iraunkorrak eskaintzeko lanean jarraitzea.

Kenya

Kenya helmuga-herrialde nagusietako bat da sorlekuko gatazketatik ihesi datozen errefuxiatuentzat; esaterako, Hego Sudan, Somalia, Etiopia edo Kongoko Errepublika Demokratikotik datozenentzat.

Kakumako errefuxiatu-eremuak 292.000 pertsona baino gehiago hartu ditu. Iragangune gisa sortu bazen ere, komunitate iraunkorra bihurtu da familia askorentzat, hainbat hamarkada eman dituztenez bertan bizitzen.

©PAULA CASADO

JRSrekin batera, ECHOk babestuta, hamar urte baino gehiago daramatzagu Kakuman lanean, sorlekuko indarkeriaren ondorioz lekualdatutako haur eta gazteek hezkuntza segurua eta kalitatezkoa izan dezaten. Alderdi hauetan zentratzen gara:

- Ikasleen matrikulazioa eta eskolan jarraitzen duen haur kopurua handitzea, eskolaz kanpoko haurrak, arriskuan dauden haurrak, ama nerabeak eta adin nagusiko ikasleak barne direla.

- Lehen eta Bigarren Hezkuntzako eskolen kalitatea hobetzea.

- Eskoletan dauden ikasle eta irakasleen segurtasuna eta ongizatea indartzea.

- Gatazka edo hondamendi naturalen ondorioz lekualdatutako biztanleei larrialdiko laguntza ematea.

- Haur, familia eta komunitateen erresilientzia indartzea, Osasun Mentaleko, Laguntza Psikosozialeko eta Ikaskuntza Sozioemozionaleko gaikuntzak eskainiz.

- Haurren babeserako eta esplotazioaren, abusuaren eta sexu-jazarpenaren aurka babesteko gaikuntzak ematea.